Rss Feed
  1. මීට කලින් පළවුනු ලිපි...

    #1 - Introduction
    #2 - Config & IDE
    #3 - Blink!
    #4 - Basic Electronics

    දැන් මේ වෙනකොට ඔයගොල්ලෝ හැමෝම සාර්ථකව තමන්ගේ ප්‍රථම ප්‍රෝග්‍රෑම් එක එහෙම ලියලා ඉන්නවා කියලා මම හිතනවා. අද මේ Tutorial එකෙන් මම බලාපොරොත්තු වෙන්නේ for loop එක හඳුන්වා දීම හා ඒ හරහා නයිට් රයිඩර් පරිපථයක් නිර්මාණය කිරීමයි. වැඩිය කතා නැතුව අපි කෙළින්ම වැඩට බහිමු.

    Project #2 - Knight Rider Circuit!

       #Hardware

    මේක project එක කළින් එකෙන් වෙනස් වෙන ප්‍රධානම හේතුව තමයි මේකට එළියෙන් පරිපථයක් නිර්මාණය කිරීමට අවශ්‍ය වීම. මෙතනදී නම් අපට LED 7ක් සහ ඒ LED වලට 220ohm ප්‍රතිරෝධක 7ක් අවශ්‍ය වෙනවා. මේ LED ටික අපි Arduino Board එකේ Digital I/O 2 සිට 8 දක්වා pins වලට සවි කරන්න ඕන. මෙතනදී අපි හදන පරිපථය පේන්නේ මෙහෙමයි.


    Breadboard View

    මේ තියෙන්නේ ඒකට අදාල Schematic එක.

    Schematic View


    මේ ටික සවිකරාම ඇත්ත ලෝකයේදී පේන්නේ මෙන්න මේ විදියට...




       #Software

    දැන් අපි ප්‍රෝග්‍රෑම් එක ලියන්න පටන්ගමු. ඉස්සෙල්ලාම අපි මේ පරිපථයේ නිවෙන පත්තුවෙන වේගය define කරන්න ඕන. ඒ නිසා ඉස්සෙල්ලාම ඒ වේගය Int එකක් විදියට Define කරන්න.

    int Speed = 100;
    

    ඊළඟට අපි අපේ LED තියෙන පින්ස් හතම Outputs විදියට නම් කරන්න ඕන. ඒ සඳහා ක්‍රම දෙකක් තියෙනවා. පළවෙනි ක්‍රමය නම් නිකම්ම ඔක්කොම පින්ස් ටික මේ වගේ වෙන වෙනම Outputs විදියට නම් කරන එකයි.

    pinMode(2, OUTPUT);
    pinMode(3, OUTPUT);
    .      .        . ;
    .      .        . ;
    pinMode(8, OUTPUT);
    

    ඒවුනාට මේ වගේ දෙයක් කරන්න අපිට for loop එක භාවිතා කරන්න පුලුවන්. for loop එක කියන්නේ Arduino language වල තියෙන තවත් Control Structure එකක්. මේ loop එක භාවිතා කරන්නේ එකම ප්‍රකාශනයක් ( Statement එකක් ) නැවත නැවතත් Repeat කරන්න. for loop එකේ සැකැස්ම මෙහෙමයි.


    ------------------------------------------------------------------


    Image Courtesy arduino.cc

    දැන් මේ loop එක වැඩකරන්නේ මෙහෙමයි.

    ඔය initialize කියල තියෙන කොටස (int x = 0; කියන කොටස) ක්‍රියාත්මක වෙන්නේ හරියටම එක පාරයි. ඒ loop එක ආරම්භයේදී විතරයි.

    ඊටපස්සේ ඕකේ test කියල තියෙන කොටස මඟින් අපි දෙන condition එක පරීක්ෂා කෙරෙනවා (මෙතනදී නම් condition එක වෙන්නේ x < 100)

    ඒ Condition එක True නම් (මෙතනදී නම් x, 100ට වඩා අඩු නම්) loop එකේ Statement block එක ක්‍රියාත්මක වෙනවා (මෙතනදී නම් println(x); කියන කොටස, එකෙන් x = 0 කියලා print වෙනවා).

    ඒක ක්‍රියාත්මක වෙලා අවසාන වුනාට පස්සේ increment or decrement වෙලා අපි define කරපු variable එකේ අගය වෙනස් වෙනවා (මෙතනදී නම් x වල අගය 0වේ සිට 1ට වැඩි වෙනවා).

    ඊට පස්සේ නැවතත් test එක වෙලා Statement Block එකට යනවා (දැන් ආපහු පාරක් initialize වෙන්නේ නෑ ) නමුත් දැන් තියෙන වෙනස නම් x වල අගය 1ක් වීමයි. (ඒ නිසා print වෙන්නේ x = 1 කියලයි).

    මේක මේ විදියට දිගින් දිගටම condition එක false වෙනකන් (මෙතනදී නම් x වල අගය 99ට වැඩි වෙනකම්) ක්‍රියාත්මක වෙනවා. ඊට පස්සේ loop එක අවසාන වෙලා ඊළඟ function එකට යනවා.


    -------------------------------------------------------------

    දැන් අපි ඕක ගැන වැඩිය හිතන්නේ නැතුව අපි දැන් for loop එක භාවිතා කරලා 2 සිට 8 දක්වා Digital Pins outputs බවට පත් කර ගමු. ඒක කරන්නේ මෙහෙමයි.


    void setup() {
      for(int ledPins = 2; ledPins < 9; ledPins++) {
        pinMode(ledPins, OUTPUT);
      }
    }
    
    
    දැන් Programme එකේ ප්‍රධාන කොටස වෙන LED නිවීම හා දැල්වීම කරන්න ඕනේ. අපිට මේ ටික කරගන්න for loop දෙකක් අවශ්‍ය වෙනවා. මේ loops දෙක ක්‍රියාත්මක වෙන්නේ මෙහෙමයි.




    පළවෙනි loop එකෙන් LED 1 සිට 6 දක්වා දැල්වෙනවා. දෙවැනි loop එකෙන් LED 7 සිට 2 දක්වා අනිත් පැත්තට දැල්වෙනවා. මේ ටික නැවත නැවතත් Repeat වෙනකොට අපිට ඕන කරන effect එක ලබාගන්න පුලුවන්. මේ සඳහා අවශ්‍ය කරන loops දෙකේ කේත සටහන් මෙහෙමයි.


    void loop() {
      
      for(int ledPins = 2; ledPins < 8; ledPins++) {
        digitalWrite(ledPins, HIGH);
        delay(Speed);
        digitalWrite(ledPins, LOW);
      }
      
      for(int ledPins = 8; ledPins > 2; ledPins--) {
        digitalWrite(ledPins, HIGH);
        delay(Speed);
        digitalWrite(ledPins, LOW);
      }
    }
    
    
    ඔය කේත ටික හැමෝටම දැන් තේරුම්ගන්න පුලුවන් ඇති කියලා මම හිතනවා. කලින් ප්‍රෝග්‍රෑම් එකට වඩා මේකේ තියෙන එකම වෙනස අපි digitalWrite function එක ඇතුලට කෙලින්ම pin number එක දාන්නේ නැතුව ඒ සඳහා for loop එක ඇතුලේ define කරපු variable එක යොදාගෙන තිබීම විතරයි.මේ දැක්වෙන්නේ අපේ සම්පූර්ණ ප්‍රෝග්‍රෑම් එක..


    int Speed = 100;
    
    void setup() {
      for(int ledPins = 2; ledPins < 9; ledPins++) {
        pinMode(ledPins, OUTPUT);
      }
    }
    
    void loop() {
      
      for(int ledPins = 2; ledPins < 8; ledPins++) {
        digitalWrite(ledPins, HIGH);
        delay(Speed);
        digitalWrite(ledPins, LOW);
      }
      
      for(int ledPins = 8; ledPins > 2; ledPins--) {
        digitalWrite(ledPins, HIGH);
        delay(Speed);
        digitalWrite(ledPins, LOW);
      }
    }
    
    
    දැන් ඉතින් දෙයියනේ කියලා Arduino බෝඩ් එක කොම්පීතරේට හයි කරලා හරියට කෝඩ් එක ටයිප් කරලා Upload button එක ඔබන්න. මේ තියෙන්නේ මම හදපු Circuit එකේ වීඩීයෝ එකක්. මගේ කැමරාවේ පොඩි අව්ලක් නිසා Audio රෙකෝඩ් වෙන්නේ නෑ :'(  :'( ඒ වුනාට ඉතින් බලන්න පුලුවන්... 



    අදට පෝස්ට් එක ඉවරයි. මේකේ මම දීලා තියෙන ප්‍රෝග්‍රෑම් එක විතරක් Test කරන්නේ නැතුව ඔයගොල්ලොත් මේ කෝඩ් වෙනස් කරලා එක එක අත්හදාබැලීම් කරලා බලන්න. කොහොමත් වැඩිපුර තේරුම් ගන්න පුලුවන් තමන්ම කරන දේ මිසක් කොහෙන්වත් කියවන දේවල් නෙවෙයි. :) ඕනම ජාතියක අව්ලක් ගියොත් යටින් කොමෙන්ට් එකක් දාලා අහන්න.. එහෙනම් කස්ටියටම ගුඩ්බායි... 
    |


  2. Arduino Tutorials #4 - Basic Electronics

    Sunday, December 30, 2012

    ඉස්සෙල්ලාම Arduino සම්බන්ධ පරණ ලිපි කියෙව්වේ නැත්නම් ඒ ටික කියවල එන්න..

    #1 - Introduction
    #2 - Config and IDE
    #3 - Blink!

    අපි දැනට Arduino හරහා අපේ පළවෙනි Project එක සාර්ථකව නිමා කරලයි තියෙන්නේ :) මීට වඩා සංකීර්ණ පරිපථවලට යන්න කලින් අපි මූලික ඉලෙක්ට්‍රොනික උපකරණ ගැන දැනගෙන ඉන්න ඕනේ. ඒ නිසා අපි මේ ලිපියෙන් දැනට බහුලව භාවිතා වෙන ඉලෙක්ට්‍රොනික උපකරණ කීපයක් ගැන ඉගෙනගෙන ඉමු. ඉස්සෙල්ලාම බලමු කොහොමද Breadboard එකක් පාවිච්චි කරන්නේ කියලා...

    Breadboards

    මේ තියෙන්නේ අපිට බහුලවම හමුවෙන ජාතියේ Breadboard එකක්.


    A Normal Breadboard

    මේ හැම Breadboard එකකම Power Lines සහ අපේ උපකරණ සවිකරන්න වෙනමම කොටස් තියෙනවා. Breadboard එකක් ඇතුලෙ තියෙන Connectionsමේ විදියයි


    Breadboard එකක සාමාන්‍ය පෙනුම

    Breadboard එක ඇතුලේ connections...

    Inside a Breadboard

    ඔය කොළපාට ඉරිවලින් පෙන්වන්නේ Breadboard එක ඇතුල සම්බන්ධ වෙන විදියයි. මේවා වලින් දෙපැත්තේ තියෙන දිග Connections දෙක අපි සාමාන්‍යයෙන් යොදාගන්නේ Power Lines විදියටයි. මේක වැඩකරන විදිය අපි ඉදිරියට Projects කරනකොට තවදුරටත් ප්‍රායෝගිකව බලාගන්න පුලුවන් වෙයි. :)

    Resistors (ප්‍රතිරෝධක)


    සාමාන්‍ය Axial-Lead type ප්‍රතිරෝධකයක්

    Resistor එකක් කියන්නේ පරිපථයක් තුල ධාරාව ගලා යෑමට බාධාවක් ඇති කරන උපාංගයක්. අපි හදන ( හෝ දකින ) සෑම පරිපථයකම වගේ අනිවාර්රයෙන්ම ප්‍රතිරෝධක අඩංගු වෙනවා. ප්‍රතිරෝධකවල අගය මනින්නේ Ohm (Ω)  කියන ඒකකය යොදාගෙනයි. සාමාන්‍යයෙන් අපි භාවිත කරන ප්‍රතිරෝධක වල අගය 1Ω සිට 1MΩ දක්වා පමණ වෙනවා. ( 1000Ω = 1KΩ , 1000KΩ = 1MΩ ) ප්‍රතිරෝධක වල අගය සටහන් කරලා තියෙන්නේ විශේශ වර්ණ කේත ක්‍රමයකට අනුවයි. මේ ක්‍රමයට අනුව 0-9 දක්වා අගයන්ට වර්ණ ලබා දී තියෙනවා. මේ ක්‍රමයට අනුව ප්‍රතිරෝධකයක වර්ණ වළලු 4ක් තියෙනවා ( 5ක් තියෙන ප්‍රතිරෝධකත් තියෙනවා. නමුත් ඒවා අපිට වැදගත් වෙන්නේ නෑ ) මේ වළලු වලින් ප්‍රථම හා දෙවන වළලු වල අගය කෙලින්ම ගන්න පුලුවන්. නමුත් 3න් වන වර්ණ වළල්ලේ අගය වෙනුවට අපි එම අගයට අදාල ගුණාකාරයෙන් පළමු අගය වැඩි කරන්න ඕන. හතර වෙනි වළල්ලෙන් පෙන්වන්නේ Tolerance එකයි. ඒ කියන්න රෙසිස්ටරයේ දක්වා ඇති අගය වෙනස් වීමේ ප්‍රතිශතයයි. අපි උදාහරණ කීපයක් අරගෙන බලමු. ඉස්සෙල්ලාම පහත දැක්වෙන වර්ණ වගුව බලන්න.



    උදා :- මේ පහළ දැක්වෙන රෙසිස්ටරය බලන්න. 






    පළවෙනි වළල්ලේ අගය = 5 ( Green )
    දෙවැනි වළල්ලේ අගය = 6 ( Blue )
    තුන්වැනි වළල්ලේ අගය = 1 (Brown )
    සිවුවැනි වළල්ලේ අගය = ± 5% ( Gold )

    සම්පූර්ණ අගය = 56 x 10^1= 560Ω ± 5%

    ( මෙහිදී පළවෙනි වළල්ලේ අගය හා දෙවැනි වළල්ලේ අගය කෙළින්ම එක ළඟ ලිවිය යුතුයි. ඉන්පසු 3න් වැනි වළල්ලට අදාල ගුණාකාරයෙන් එම අගය ගුණ කළ යුතුයි. )

    උදා 2 :- මේ ප්‍රතිරෝධකයේ අගය ගණනය කරමු.




    පළවෙනි වළල්ලේ අගය = 4 ( Yellow )
    දෙවැනි වළල්ලේ අගය = 7 ( Violet )
    තුන්වැනි වළල්ලේ අගය = 3 ( Orange )
    සිවුවැනි වළල්ලේ අගය = ± 5% ( Gold )

    සම්පූර්ණ අගය = 47 x 10^3= 47000Ω = 47KΩ ± 5%

    රෙසිස්ටරයක සම්මත පරිපථ සංකේතය විදියට පහත දැක්වෙන සංකේත දෙකම භාවිතා කරන්න පුලුවන්.




    Transistors (ට්‍රාන්සිස්ටර)


    විවිධ වර්ගවල ට්‍රාන්සිස්ටර
    අපිට විවිධ පරිපථ සාදද්දී තවත් නැතුවම බැරි දෙයක් තමයි ට්‍රාන්සිස්ටර කියන්නේ. ට්‍රාන්සිස්ටරයකට ස්විචයක් විදියට හෝ ධාරා වර්ධකයක් ලෙස ක්‍රියා කරන්න පුලුවන්. අපි මේවායේ ප්‍රායෝගික භාවිත ගැන ඉදිරියට කථා කරමු. ඕනම ට්‍රාන්සිස්ටර්යක අපිට Pins තුනක් දැකගන්න පුලුවන්. මේ Pins නම් කරන්නේ පාදම ( Base - B ), විමෝචකය ( Emitter - E ) හා සංග්‍රාහකය ( Collector - C ) කියලයි. මේවාරින් අපි පාදමට ලබාදෙන ධාරාවක් හරහා සංග්‍රාහකය සහ විමෝචකය අතර ගලා යන විදුලිය පාලනය කරන්න පුලුවන්. අපි පාවිච්චි කරන ට්‍රාන්සිස්ටර NPN හා PNP ලෙස ප්‍රධාන කොටස් දෙකකට වර්ග කරන්න පුලුවන්. මේ වර්ග දෙක අතර තියෙන එකම් වෙනස නම් NPN ට්‍රාන්සිස්ටර වල ධාරාව ගලා යන්නේ C සිට E වෙතටයි. නමුත් PNP ට්‍රාන්සිස්ටරයක ධාරාව ගලා යන්නේ E සිට C වෙතටයි. මම මේවා ගැන මෙතනදී වැඩිය කථා කරන්න යන්නේ නෑ..

    TO-92 ප්‍රමාණයේ ට්‍රාන්සිස්ටරවල Pin සැකැස්ම හා අදාල පරිපථ සංකේත
    `
    Capacitors (ධාරිත්‍රක)


    විවිධ වර්ගවල ධාරිත්‍රක
    ධාරිත්‍රක භාවිතා වෙන්නේ පරිපථයක තාවකාලිකව විදුලිය රඳවා තබාගැනීමටයි. අපිට සරලවම ධාරිත්‍රයකයක් Rechargable Battery එකක් විදියට හඳුන්වන්න පුලුවන්. එකම වෙනස වෙන්නේ මේකේ ධාරිතාවය සාපේක්ෂව ඉතාම අඩු වීමයි. ( ඔයගොල්ලෝ අනිවාර්රයෙන්ම දැකලා ඇති ඔය Phone Chargers එහෙම ප්‍රධාන විදුලියෙන් විසන්ධි කරපු ගමන්ම ඒකේ තියෙන LED එක නිවෙන්නේ නැති බව. ඒ LED එක ටික වෙලාවක් දිගටම දැල්වෙනවා. එහෙම වෙන්නේ ඒ එක ඇතුලේ තියෙන ධාරිත්‍රක වල Charge එක නිසයි ) ධාරිත්‍රක ප්‍රායෝගික භාවිතයේදී බැටරියක් වගේම ධාරාවන් සුමටනය කීරීමටත් භාවිතා වෙනවා. මේවායේ ප්‍රායෝගික භාවිතයන් අපි ඉදිරියට විමසා බලමු. පහල දැක්වෙන්නේ Capacitors වල සම්මත පරිපථ සංකේතයි.



    Diodes

    Diode එකක් කියන්නේ මූලිකවම එක පැත්තකට පමණක් ධාරාව ගලා යෑමට ඉඩදෙන ඉලෙක්ට්‍රොනික උපාංගයක්.  LED කියන්නෙත් Diodes වර්ගයක්ම තමයි. Diodes භාවිතා කරලා AC --> DC බවට පත්කිරීම වගේ දේවල් කරන්න පුලුවන්. මේ තියෙන්නේ Diodes වලට අදාල පරිපථ සංකේතය.



    Relays (පිළියවන)


    Relays!

    Relays භාවිතා කරලා අපිට කුඩා ධාරාවක් මඟින් ඉතා විශාල ධාරාවක් පාලනය කරන්න පුලුවන්. ට්‍රාන්සිස්ටර වලට වඩා මේවායේ තියෙන විශේශත්වය වෙන්නේ Relays මඟින් අපේ පරිපථය Load එකෙන් ඒකලිත (Isolate) කිරීමයි. ඒ කියන්නේ අපිට Microcontroller එක මඟින් සාමාන්‍ය 230V AC බල්බයක් දැල්වීමට අවශ්‍ය වුනොත් Relay එකක් භාවිත කරන්න පුලුවන්. එතකොට අපේ පරිපථය හා බල්බය එකිනෙකින් සම්පූර්ණයෙන්ම වෙන්වෙනවා. එතකොට බල්බයට යන විශාල ධාරාව නිසා අපේ Microcontroller එකට හානිවීම වැලැක්වෙනවා. මේවා භාවිතයත් අපි ඉදිරියේදී කරමු.


    A Circuit to Drive an AC Device using a Microcontroller

    අද පෝස්ට් එකෙන් මම කථාකරන්න බලාපොරොත්තු වෙන්නේ මේ උපාංග ටික ගැන විතරයි. මේවාට අමතරව අපිට ඉලෙක්ට්‍රොනික ලෝකයේදී හමුවන උපාංග ඉතා විශාල ප්‍රමාණයක් තියෙනවා. අපි ඉතින් ඒවා ගැන අදාල තැන්වලදී කථාකරමු...ඕනම ප්‍රශ්නයක් තියෙනවනම් යටින් කමෙන්ට් කරලා අහන්න පුලුවන්...

    එහෙනම් අපි කැපුනා! ඊළඟ පෝස්ට් එකෙන් නයිට් රයිඩර් පරිපථය හදමු.. :D
    |


  3. Arduino Tutorials #3 - Blink!

    Friday, December 28, 2012


    කලින් ලිපි තාම කියෙව්වේ නැද්ද?

    Arduino Tutorials #1 - Introduction
    Arduino Tutorials #2 - Config and IDE

    වෙල්කම් බැක්! දැන් එහෙනම් අපි Arduino Software එක ගැන ටිකක් දැනගෙන ඉමු.

    Arduino Software එක ප්‍රධාන කොටස් දෙකකින් සමන්විතයි. ඒ Arduino IDE ( Integrated Development Environment ) එක සහ ප්‍රධානම Core Libraries වලින්.මේ දෙකෙන් අපි ප්‍රෝග්‍රෑම් ලියන්න භාවිතා කරන්නේ Arduino IDE එකයි. ( Libraries වලින් කරන්න පුලුවන් දේවල් ගැන අපි ඉදිරි පෝස්ට් වලින් කතාකරමු. ) මේ IDE එක ලියලා තියෙන්නේ ජාවා යොදාගෙන. ඒ වගේමයි මේ IDE එක ප්‍රධාන වශයෙන්ම පදනම් වෙලා තියෙන්නේ Processing කියන Development Environment එක මතයි. මේකේ වැදගත්ම කොටස වෙන Arduino Language වෙන එක පදනම් වෙන්නේ අපි හැමෝම දන්න C සහ C# Languages දෙක මතයි. මේ Software එකේ හැම කොටසක්ම විවෘත මෘදුකාංග විදියට තමයි තියෙන්නේ.

    ඔය තියෙන දේවල් එකක්වත් අපිට Projects කරන්න කිසිම විදියකට වුවමනා වෙන්නේ නෑ. ඒ වුනාට ඉතින් හැමදේකම වටපිටාව දැනගෙන ඉන්න එක හොඳයිනේ ;)
    දැන් එහෙනම්,

    Project #1 - Blink!

    මේ ප්‍රොජෙක්ට් එක බොහොම සරලයි. අපි මේකෙදී කරන්න බලාපොරොත්තු වෙන්නේ Arduino Board එකේ Inbuilt තියෙන LED එක නිවි නිවී පත්තුවෙන්න සකස් කිරීමයි. මේ Inbuilt LED එක කිව්වේ L LED එක. ඔයගොල්ලො කලින් පෝස්ට් එක කියෙව්වනම් මේ L LED එක සවිවෙලා තියෙන්නේ Digital Pin 13 වලට කියලා මතක ඇති.. මේ Project එකේදී අපට වෙන කිසිම දෙයක් Arduino Board එකට එලියෙන් සවිකරන්න වුවමනා වෙන්නේ නෑ. Board එක තිබුනාම ඇති.


    L LED UNO
    L LED of Arduino UNO

    ඕනම Arduino programme එකක අනිවාර්‍රයෙන්ම තියෙන Structures දෙකක් තියෙනවා. ඒ තමයි "void setup ()" සහ "void loop ()" කියන Structures දෙක. අපි ලියන ප්‍රෝග්‍රෑම් එක දාන්න ඕන මේ "setup" සහ "loop" කියන කොටස් දෙක ඇතුලටයි. මේ දෙකෙන් "setup" කියන එක අපි Programme එක ස්ටාර්ට් කරාම එක පාරක් වැඩකරලා ඊළඟට "loop" කියන එකට යනවා. "loop" එක හැමදිස්සෙම ආපහු ආපහු වැඩ කරකර තමයි තියෙන්නේ. ඒ නිසා ඔයගොල්ලන්ට තේරෙනවා ඇති අපට ප්‍රෝග්‍රෑම් එකේ එකපාරක් විතරක් වෙන්න ඕන දෙවල් ටික "setup" එක ඇතුලට දාලා ඊළඟට repeat වෙන්න ඕන දෙවල් ටික "loop" එක ඇතුලට දාන්න ඕන බව..  තේරුනේ නැත්නම් දිගටම කියවගෙන යන්න...තේරුනත් දිගටම යන්න :P


    අපි දැන් අපේ ප්‍රෝග්‍රෑම් එකේ වෙන්න ඕන දෙවල්. ඒ කියන්නේ pseudo code එකක් වගේ එකක් ලියමු.( ඒ කියන්නේ අපේ ප්‍රෝග්‍රෑම් එකේ ව්‍යූහය ) දැන් අපිට අපේ Pin 13 එකේ තියෙන LED එක Blink කරන්න නම් පහල තියෙන දේවල් කරන්න ඕන.

    1) LED එක සවිකර ඇති Pin එක Pin 13 බව Arduino එකට පැවසීම.
    2) එම Pin එක Output එකක් බවට පත් කිරීම.
    3) LED එක දැල්වීම.
    4) ටික වේලාවක් බලාසිටීම.
    5) LED එක නීවීම.
    6) ටික වේලාවක් බලාසිටීම.
    7) නැවතත් අංක 3 වෙත යෑම.

    ඔය පියවරවල් ටික බැලුවාම ඔයගොල්ලන්ට බොහොම පහසුවෙන් අවබෝධ කර ගන්න පුලුවන් දෙයක් තමයි ඔතන තියෙන පියවර 1 හා 2 එක පාරක් වැඩකරාම ඇති බව. නමුත් පියවරවල් 3 සිට 7 දක්වා නැවත නැවතත් Repeat වෙන්න ඕන. ඒ නිසා අපි ඔය පියවරවල් වලින් 1 සහ 2 දානවා එක "setup" ඇතුලට. අනිත් ටික (3 සිට 7 දක්වා) දානවා "loop" එක ඇතුලට.

    දැන් අපි ලියන්න පටන්ගමු. ඉස්සෙල්ලම කරන්න ඕන අපේ ledpin එක මොකද්ද කියලා define කරන එකයි. ඒ සඳහා මම මෙහෙම ලියනවා.

    int ledpin = 13;
    

    
    
    
    
    
    
    
    
    
    
    ඔය line එකෙන් කෙරෙන්නේ Pin 13 කියන එක Int එකක් විදියට define කරන එකයි. ඊට පස්සේ අපිට හැමතැනම Pin 13 වෙනුවට ledpin කියලා කියන්න පුලුවන්. ( මෙතනදී ledpin කියලාම කියන්න අවශ්‍ය වෙන්නේ නෑ. ඔයගොල්ලන්ට කැමති නමක් දෙන්න පුලුවන්. නමුත් ඒ pin එකට අදාල නමක් දැම්මාම ඒක බොහොම පහසුවක් වෙනවා.) මේවගේ define කරන ඒවා අපි "setup" හා "loop" කියන දෙකටම කලින් කරන්න ඕන.

    දැන් ledpin එක output එකක් කරන එක අපි "setup" එක ඇතුලෙ කරන්න ඕන. ඒක මෙහෙම කරන්න පුලුවන්.


    void setup() {                
      pinMode(ledpin, OUTPUT);     
    }

    දැන් අපේ "loop" එක ආරම්භ කරන්න ඕන. ඒ සඳහා අවශ්‍ය සම්පූර්ණ කේත සටහනම මෙහෙමයි.

    void loop() {
      digitalWrite(ledpin, HIGH);
      delay(1000);
      digitalWrite(ledpin, LOW);
      delay(1000);
    }
    
    ඔතන තියෙන "digitalWrite" කියන function එකෙන් කෙරෙන්නේ අපේ outputs විදියට define කරලා තියෙන digital pins, on හරි off හරි කරන එකයි. ( HIGH කියන්නේ on කියන එකයි. LOW කියන්නේ off වලටයි )
    
    
    
    
    ඒවගේම අපි "delay" කියන function එක භාවිතා කරන්නේ අපේ programme එක වැඩකිරීම යම්කිසි වේලාවකට නවත්වා තැබීමටයි. මෙතනදී නම් LED එක ඔන් කළාට පස්සේ ආපහු LED එක off වෙන්න කලින් තත්පරයක කාලයක් LED එක on තත්වයේම තබාගැනීම delay එක මඟින් මෙතනදී සිදුකරනවා. ( delay function එකෙදී අපි delay time එක ලබාදෙන්න ඕන මිලිතත්පර වලිනුයි.  එක තත්පරයකට මිලිතත්පර 1000ක් තියෙනවා. | | 1 second = 1000 milliseconds )
    
    
    
    

    ඉතා වැදගත්! :- Arduino Language එක Case Sensitive. ඒ කියන්නේ කැපිටල් සහ සිම්පල් අකුරු හරි විදියට තියෙන්න ඕන. ඒ හින්දා මම මෙතනදී දෙන කෝඩ් එක ඒ තියෙන විදියටම ලියන්න. කැපිටල් සිම්පල් මාරු කරන්න එපා. 

    උදා : - Digitalwrite() - මේක වැරදියි.
               DigitalWrite() - මේකත් වැරදියි. 
               digitalWrite()- මේ විදිය විතරයි හරි.

    
    
    
    
    මෙතනදී අපි අපේ "loop" එක ඇතුලේ තියෙන කෝඩ් එක repeat  වෙන්න කියලා කියන්න අවශ්‍ය වෙන්නෙ නෑ. "loop" එක ඇතුලේ තියෙන දේවල් ටික ක්‍රියාත්මක (execute) වෙලා ඉවරවුනාට පස්සේ ආපහු එයාම "loop" එකේ ආරම්භයට යනවා.
    
    
    මේ තියෙන්නේ අපේ සම්පූර්ණ ප්‍රෝග්‍රෑම් එක!

    int ledpin = 13;
    
    void setup() {                
      pinMode(ledpin, OUTPUT);     
    }
    
    void loop() {
      digitalWrite(ledpin, HIGH);
      delay(1000);
      digitalWrite(ledpin, LOW);
      delay(1000);
    }
    
    
    
    
    දැන් අපේ ප්‍රෝග්‍රෑම් එක සම්පූර්ණයි! දැන් ඉතින් Arduino IDE එකේ තියෙන Upload Button එක ඔබලා ප්‍රෝග්‍රෑම් එක බෝඩ් එකට upload කරන්න. 

    
    
    Upload Button Position
    Upload Button
    වැඩේ සාර්ථකව කළානම් L LED එක නිවී නිවී පත්තු වෙන්න ඕන. මේ වීඩියෝ එක බලන්න.

    
    

    
    
    
    
    
    
    
    
    එහෙනම් අදට පෝස්ට් එක ඉවරයි. අපි ඊළඟ පෝස්ට් එකෙන් නයිට් රයිඩර් පරිපථයක් හදන විදිය හා Analog Inputs/Controls ගැන ඉගෙනගමු, ඒ දෙකම එකට යොදාගෙන ප්‍රොජෙක්ට් එකකුත් කරමු!. මෙතෙක් කරපු දේවල් මොනව හරි ප්‍රශ්නයක් තියෙනවනම් යටින් කමෙන්ට් කරන්න.. :))
    |


  4. Arduino Tutorials #2 - Arduino Config & IDE

    Thursday, December 27, 2012

    මම හිතනවා මේ වෙනකොට හැමෝම අපේ පළවෙනි ලිපිය කියවලා තව ගූග්ල් දෙයියාගෙනුත් අහලා Arduino ගැන යම් තරමක අවබෝධයක් සහ ඒකෙන් කරන්න පුලුවන් දේවල් ගැනත් දැනගෙන ඇති කියලා. අද එහෙනම් අපි ඉස් ඉසෙල්ලම Arduino Board එකක කොටස් අඳුරගෙන අපේ පළවෙනි ප්‍රෝග්‍රෑම් එක ලියමු!


    ඔය පහළින් තියෙන්නේ Arduino UNO බෝඩ් එකක් කොටස්..




    1) USB සම්බන්ධතාවය
    2) DC Power Jack
    3) ATMega 328P මයික්‍රෝප්‍රොසෙසරය
    4) Communications Chip එක
    5) 16Mhz ක්ලොක් ( Crystal ) එක
    6) Reset Button
    7) Power LED

    8) TX/RX LEDs
    Arduino එකේ Serial data communication ගැන බලාගන්න පුලුවන් මේ LED වලින්. Serial හරහා Arduino එකට ඩේටා එවනකොට මෙතන තියෙන RX LED එක බ්ලින්ක් වෙනවා. ඒවගේම Serial හරහා Arduino එක විසින් ඩේටා එවනකොට TX LED එක බ්ලින්ක් වෙනවා.

    9) L LED
    මේ LED එක Digital Pin 13 එකට අභ්‍යන්තර ප්‍රතිරෝධකයක් හරහා සම්බන්ධ වෙනවා.

    10) Power Pins
    මේ pins, Arduino එකට විදුලිය සපයන්න වගේම කරන්ට් එක එලියට ගන්නත් භාවිතා කරන්න පුලුවන්.

    11) Analog Input Pins
    Arduino එකට Analog Inputs ගන්න මේ Pins පාවිච්චි කරනවා.

    12) TX/RX Pins

    13) Digital I/O pins
    ගොඩක් වෙලාවට Outputs ගන්න මේ පින් පාවිච්චි කරනවා. ඒ වගේම මේවාට Inputs වුනත් සවි කරන්න පුලුවන්.

    14) AREF ( Analog Reference ) and GND

    15) ICSP (In-Circuit Serial Programming ) for ATMega 328P

    16) ICSP for USB

    මෙතන තියෙන දේවල් වැඩිය තේරුනේ නැති වුනාට එච්චර කලබල වෙන්න දෙයක් නෑ. අපි ඉස්සරහට ප්‍රොජෙක්ස් කරගෙන යනකොට මේවා ප්‍රායෝගිකව පාවිච්චි කරනකොට ඒවා ලේසියෙන්ම තේරුම්ගන්න පුලුවන්. :)

    නියමයි! දැන් අපි කෙලින්ම ප්‍රෝග්‍රැමින් වලට බහිමු. Arduino ප්‍රෝග්‍රෑම් කරන්න නම් ඔයාලගේ පරිගණකයේ Arduino Software එක තියෙන්න ඕන. මේක වින්ඩෝස්, ලිනක්ස් සහ මැක් යන OS තුනටම සහයෝගය දක්වනවා. ඒවගේම මේ Arduino Software එක ස්ථාපනය කිරීමක් අවශ්‍ය වෙන්නේ නෑ. දැනට තියෙන අලුත්ම සංස්කරණය වෙන්නේ Arduino 1.0.3 එකයි. ඒක මෙතනින් බාගන්න.

    සටහන :- Arduino Software එක දුවන්නේ Java මත නිසා ඔයාලට Java Runtime Environment එකත් පරිගණකයේ තිබීම අවශ්‍ය වෙනවා. දැනටමත් ඔයගොල්ලෝ Java දාලා නැත්නම් මෙතනින් Java Download කරගන්න.

    ඊටපස්සේ ඩවුන්ලොඩ් වුනු zip ෆයිල් එක වෙනම ෆෝල්ඩයරක් ඇතුලට Extract කරගන්න. ඊට පස්සේ ඒක ඇතුලේ තියෙන "Arduino.exe" ප්‍රෝග්‍රෑම් එක රන් කරන්න. දැන් ඔයගොල්ලෝ ප්‍රෝග්‍රෑම් කරන්න සූදානම්!


    Run "arduino.exe"


    Arduino Software එක ලෝඩ් වෙනවා!


    දැන් අපි ඉස්සෙල්ලම කරන්න ඕන අපේ Arduino බෝඩ් එක පරිගණකයට සම්බන්ධ කරන එකයි. එහෙම සම්බන්ධ කරාට පස්සේ අපේ Board එක පරිගණකයට සම්බන්ධ කරල තියෙන පෝට් එක සහ අපේ Board එකේ වර්ගය Arduino Software එකට කීයන්න ඕන. මේ පෝට් එක Device Manager හරහා දැනගන්න පුලුවන්. ඒ සඳහා පහත දැක්වෙන පියවරවල් අනුගමනය කරන්න.


    සටහන :- Arduino USB වුනාට ඒක වැඩකරන්නේ Serial Emulation යොදාගෙන. ඒ කියන්නේ අපි මේක USB හරහා සම්බන්ධ කරාට පරිගණකය හිතන්නේ මේක හයිකරලා තියෙන්නේ Serial Port එකක් හරහා කියලයි. ඒ නිසා අපේ Board එකට අංකයක් තියෙනවා මේ වගේ ( COM1 ).


    1. Arduino Board එක පරිගණකයට සවිකර තිබියදී Device Manager එකට යන්න. එකේ Ports කියන Section එක යටතේ ඔයගොල්ලන්ගේ බෝඩ් එකේ නමත් එක්ක ඒකට අදාල පෝට් එක බලාගන්න පුලුවන් වෙයි.
    2. Arduino Software එකේ Tools >> Serial Port වලට ගිහින් ඔයගොල්ලන්ගේ Arduino Board එකට අදාල පෝට් එක select කරන්න. ඒ සමඟම Tools >> Board හරහා ඔබගේ Board එකේ වර්ගයද තෝරා දෙන්න.



    Device Manager එකට යන විදිය

    අදාල Serial පෝට් එක (මෙතනදී නම් COM6)
    Selecting the Correct Port
    Selecting Your Board Type

    ඔබ ඉහත පියවරවල් ටික නිවැරදිව සම්පූර්ණ කර ගත්තා නම් දැන් ඔබ Arduino Board එක නිවැරදිව Configure කර ගෙන අවසානයි. දැන් ඉතින් තියෙන්නේ Project එකක් කරන්න තමයි. මම මුලින් හිතුවෙ ඒකත් මේ පෝස්ට් එකත් එක්කම දාන්නයි. නමුත් දැන් ඒකට ටිකක් ඉඩ වැඩිය යන නිසා ප්‍රෝග්‍රෑමින් ඊළඟ පෝස්ට් එකෙන්ම දාන්නම්. මේ වන තෙක් මොකක් හරි ප්‍රශ්නයක් ආවානම් යටින් කොමෙන්ටුවක් දාන්න. එහෙනම් අපි ගියා!
    |


  5. Arduino Tutorials #1 - Introduction

    Sunday, December 23, 2012

    කොහොමද ඉතින් කට්ටියට? මාස ගාණක පොලු වලින් පස්සේ ආයෙ මේ පැත්තේ ටිකක් එන්න හිතුනා :D ආවට මොකද ලියන්න දෙයක් තමයි නැත්තේ... :P ඒ හින්දා ලියන්න දෙයක් හොයනකොට තමයි Arduino ගැන මතක්වුනේ. මම සෑහෙන කාලෙක් ඉඳන් Arduino පාවිච්චි කරකර ඉඳලා, ටික කාලෙකට කලින් ඒක අතෑරලා, ළඟදී ආයෙමත් පාවිච්චි කරන්න පටන් ගත්තා. :P කොහොමත් මේ දවස්වල හැමෝගෙම ට්‍රෙන්ඩ් එක තියෙන්නේ ඉලෙක්ට්‍රොනික්ස් පැත්තට නේ. 

    උදා :- ටෙක්කතා ගෘප් එකෙන් Arduino clone එකක් නිශ්පාදනය කිරීම :P


    ඒ හින්දම ඉතින් මාත් Arduino සම්බන්ධ කරගෙන කරන්න පුලුවන් කූල් වැඩ ගැන ලිපි (පෙළක් ??) ලියන්න හිතුවා. :D ඔන්න එහෙනම් පටන්ගමු...


    හැමදාම වගේ ඉස්සෙල්ලම කියන්න ඕනනේ Arduino කියන්න මොකද්ද කියල. මේක හදපු අයම කියන විදියට,



    "Arduino is an open-source electronics prototyping platform based on flexible, easy-to-use hardware and software. It's intended for artists, designers, hobbyists, and anyone interested in creating interactive objects or environments."

    ඕකේ තියෙන වැඩක් ඇති දේවල් ටික නම්,

    1) Arduino කියන්නේ සම්පූර්නයෙන්ම නිදහස් දෘඩාංග සහ මෘදුකාංග වලින් සැදුම්ලත් එකක්. Arduino වලට අදාල ඕනම ක්‍රමානුරූප (Schematics) ඕන දෙයක් ඒගොල්ලන්ගෙම වෙබ්සයිට් එකක් ඩවුන් කරගන්න පුලුවන්.

    2) Easy-to-use - ඔය තියෙන්නේ හැමෝම හොයන එක :D ඇත්තටම Arduino වලින් ප්‍රෝග්‍රෑම් කරන එක සහ Arduino සම්බන්ධ පරිපථ නිර්මාණය හරිම සිම්පල් වැඩක්. ඒවා අපි ඊළඟට බලමුකෝ..



    මේ වෙනකොට ගොඩක් අයට ප්‍රශ්නයක් ඇති වෙල ඇති PIC සහ Arduino අතර තියෙන වෙනස්කම් මොනවද කියලා. (එහෙම ප්‍රශ්නයක් ඇති වෙලා නැත්නම් මේ ඡේදය අතෑරලා ඊළඟ එකට යන්න.. :D )PIC සහ Arduino අතර තියෙන ප්‍රධානම වෙනස්කම තමයි PIC කියන්නේ නිකම්ම Microprocessor එකක් විතරයි. ඒවුනාට Arduino කියන්නේ සම්පූර්ණ prototyping platform එකක්. platform එකක microprocessor එකට අමතරව ප්‍රොග්‍රැමර් එකක් සහ power supply එකක් සහ පරිගණකය හා සම්බන්ධ කරන ක්‍රමයක් (USB or Serial) යන සියල්ලම අන්තර්ගත වෙනවා. ඒ කියන්නේ අපි Arduino බෝඩ් එකක් මිලදී ගත්තාම ඒක කෙලින්ම පරිගණකයට සම්බන්ධ කරල වැඩ පටන්ගන්න පුලුවන්. 


    • Arduino වල භාවිතා කරන්නේ Atmel සමාගමෙන් නිෂ්පාදනය කරන Microprocessor range එකයි. උදාහරනයක් විදියට දැන් වැඩිපුරම ජනප්‍රිය Arduino UNO R3 බෝඩ් එකේ භාවිතා වෙන්නේ Atmega 328P කියන ප්‍රොසෙසර් එක.

    An Arduino UNO

    Arduino වලින් කරන්න පුලුවන් මොනවද කියල අපි දැන් බලමු. ඇත්තටම Arduino වලින් කරන්න බැරි මොනවද කියල තමයි හරි විදියට නම් බලන්න ඕනේ. ඉලෙක්ට්‍රොනික් පැත්තෙන් ඔයගොල්ලෝ කවදාවත් කරන්න බැරි තරම් අමාරුයි කියල හිතාගෙන හිටපු ගොඩක් දේවල් Arduino පාවිච්චි කරලා සෑහෙන ලේසියෙන් කරගන්න පුලුවන්. ඉස්සර අපිට නයිට් රයිඩර් සර්කිට් එකක් හදාගන්න ඕන වුනාම ඒකට විඳපු දුක මතකයි නේද? 4017 IC එක හොයාගෙන ඒකටත් සෑහෙන කට්ටක් කන්න ඕන වුනා. ඒවුනට Arduino වලින් නයිට් රයිඩර් සර්කිට් එකක් හදාගන්න ඔයගොල්ලන්ට ඕන වෙන්නේ Arduino Board එක හැරුනාම LED 10කුයි එක resistor එකකුයි විතරයි. ඒ වගේ සරල දේක ඉඳලා LCD Character Display එකක් පාලනය කරන්න, ඔය ලස්සන ලස්සන LED Cubes හදන්න, Line follower නැත්නම් Obstacle avoiding රොබෝලා නිර්මාණය කරන්න, ගෙදර දොරක් නැත්නම් ජනේලයක් ඇරියොත් Twitter post එකක් හරි SMS එකක් හරි එවන්න, Touch Screen එකක් හරහා වැඩ කරන්න පුලුවන් Home Automation Systems,  Autopilot හෙලිකොප්ටරයක් වගේ දෙයක් හදන්න වුනත් Arduino පාවිච්චි කරන්න පුලුවන්. :O


    Arduino එකක් හරහා පාලනය වන 8x8x8 LED Cube එකක්


    An LCD Character Display 16x2




    Arduino වලින් වැඩ කරන්න පටන්ගන්නනම් ඔයගොල්ලෝ ඉස්සෙල්ලම Arduino Board එකක් මිලදී ගන්න ඕන. ගාන ප්‍රශ්නයක් නැත්නම් ගන්න පුලුවන් හොඳම එක මම ඉස්සෙල්ලා කියපු Arduino UNO R3 බෝඩ් එක. එහෙමත් නැත්නම් වෙන Arduino clone එකක් වුනත් ගන්න පුලුවන් කිසිම ප්‍රශ්නයක් නැතුව. දැනට තියෙන ලාබම වගේ clone එක තමයි Techkatha එකෙන් හදන TechDuino එක. ඒක රු1500 වගේ මිලකට ඔයගොල්ලන්ට මිලදී ගන්න පුලුවන් shop.techkatha.com හරහා. එහෙම නැත්නම් ඔය ebay එකේ තියෙන ඕනම clone එකක් මිලදී ගන්න කිසිම ප්‍රශ්නයක් ඇතිවෙන්නේ නෑ...

    අපි ගොඩක් වෙලාවට මයික්‍රෝකන්ට්‍රෝලර් එකකින් බලපොරොත්තු වෙන්නේ මොනවහරි Input එකක් අරගෙන ඒ Input එකට අනුව Output එක පාලනය කිරීමයි. මේවගේ Inputs ලබාදෙන්න අපි එක එක ජාතියේ Sensors පාවිච්චි කරනවා. උදාහරණ විදියට උෂ්නත්වය මනින සංවේදක, දුර මනින සංවේදක, Hall effect sensors, ආලෝක තත්වය, ඒ වගේම නිකම්ම Switch එකක් උනත් Input එකක් වෙන්න පුලුවන්. අපි දැන් මේ Input Devices කීපයක් ගැන බලමු.


    IR Distance Sensor




    IR Distance Sensor එකක්. අපි මේවගේ ඒවා ගොඩක් වෙලාවට Line Follower රොබෝලා හදන්න පාවිච්චි කරනවා


    Ultrasonic Sensor



    Ultrasonic Distance Sensor එකක්. මේවගේ එකක් පාවිච්චි කරලා අපිට මීටර් හතරක දුරක් ආසන්න සෙන්ටිමීටරයට නිවැරදිව කියන්න පුලුවන්. ගොඩක් වෙලාවට ඔය Navigational Robotsලා වගේ දේවල් හදන්න මේක සෑහෙන්න ප්‍රයෝජනවත් වෙනවා. මේකෙන් කරන්නේ අතිධ්වනික තරංගයක් යවලා ඒ තරංගය අපේ Object එකේ වැදිල ආපහු එන්න යන වෙලාව මැනීමයි..



    DHT22 Temp Sensor



    Temperature and Humidity Sensor එකක්. මේක අපේ අවට පරිසරයේ උෂ්නත්වය හා ආර්ද්‍රතාවය නිර්ණය කිරීමට පාවිච්චි කරන්න පුලුවන්. මේවගේ එකක් පාවිච්චි කරල අපිට AC එකක් නැත්නම් fan එකක් වගේ දෙයක් යම්කිසි උෂ්නත්වයකට ළඟාවුනාම ඉබේම ක්‍රියාත්මක වෙන්න හදන්න පුලුවන්..





    Project එකක් හැදුවට පස්සේ අපිට වැඩිපුරම වැදගත් වෙන්නේ Outputs නේ. Arduino වලදී නම් Output එකක් ගන්න LCD Character Displays, TFT Colour Screens , TV එකක් :D එහෙමත් නැත්නම් කෙලින්ම පරිගණකය වුනත් යොදාගන්න පුලුවන්. අපි අපේ මේ ලිපිපෙළ තුලින් මේ හැම ජාතියකම Devices පාවිච්චි කරන්න බලාපොරොත්තු වෙනවා. ඒ වගේම ඇත්තටම ප්‍රයෝජනවත් Consumer Electronicsනුත් Projects විදියට හදන්න බලාපොරොත්තු වෙනවා.

    හරි එහෙනම්. මම මෙතනින් අදට පෝස්ට් එක නිමා කරනවා. මම ඊළඟ දවසේ Blinking LED එකක්, නයිට් රයිඩර් සර්කිට් එකක්, Analog Readings Arduino එකට ගන්න විදිය, Analog Reading එක හරහා නයිට් රයිඩර් සර්කිට් එකේ වේගය පාලනය කිරීම හා පරිගණකය හරහා LED On/Off කරන විදිය යන සියලුම දේවල් කරන්න බලාපොරොත්තු වෙනවා. එහෙනම් ඊළඟ දවසේ මෙන්න මේව ටික හොයාගෙන ඉන්නකෝ.


    1. Arduino Board එක (ඕන ජාතියක එකක්) with the USB cable -1
    2. LED - 10
    3. 220 ohm Resistor - 2
    4. 10K Potentiometer ( Preset ) - 1
    5. Jumper Cables (22AWG වයර් ඕන එකක්.. උදා :- Ebay)
    6. Breadboard -1 


    සටහන :- සාමාන්‍යයෙන් අපි මොනව Project හරි එකක් හදනකොට ඒක ඉස්සෙල්ලම හදන්නේ Prototyping Board එකක. Breadboard කියන්නේත් ඒවටම තමයි. මේ Breadboard එකක් යොදාගැනීමේ වාසි ගොඩක් තියෙනවා. වැරදෙන ඒව හදන්න පුලුවන් වෙන එක තමයි ප්‍රධානම වාසිය. ඊට අමතරව පාස්සන්න අවශ්‍ය නැති නිසා Circuit එක ගොඩක් පහසුවෙන් හදල ඉවර කර ගන්න පුලුවන්. පොඩි Breadboard එකක් සාමාන‍යෙන් රු300-400 අතර මුදලකට මිලදී ගන්න පුලුවන්. එක Breadboard එකක් අවුරුදු ගානක් පාවිච්චි කරන්න පුලුවන් නිසා මේ මුදල කොහෙත්ම නාස්තියක්නම් වෙන්නේ නෑ..



    පොඩි Breadboard එකක්

    කස්ටියටම ගුඩ්බායි එහෙනම්.... :D අපි කැපුනා.. 


    |